Kiss..Kiss..Kiss (Video)

一一最近有個新lover 佢地真係打得火熱, 每次一一見到佢都要尖叫+狂咀一番先收手, 痴纏到要拍低同大家share.

(仔, 大個左就吾好咁"狼胎"喇會嚇親女仔嫁)

抱抱

實在太不捨得每晚與一一分開, 因此我們決定每晚接他回家每朝早由我送到地鐵站給奶奶照顧. 
我不知道這2個星期一一會否不喜歡這樣的改變, 每晚帶他出街一朝早又叫他起床會否令他覺得疲累, 但對我們兩公婆來說終於尋回"一家人"的感覺.

小朋友的成長快得有點驚訝, 上星期還很愛人抱抱, 最近幾天不知從哪裡學會推開人. 

我明白這個是成長的階段(特別他是仔仔), 因此更珍惜可抱, 可親, 每一個可和他一起的時間.

6個月

不經不覺一一6個月了, 時間真的過得好快. 自從5個月時由奶奶湊之後, 每日(正確黎講係每晚)只有3個鐘見面, 因此時間過得更快.

一一由奶奶全職照顧後感恩生活規律了, 睡眠質素也好了(最記得4-5個月時每晚最少起4次執奶咀真的很恐怖), 而且轉食一餐固體進度也幾好,
不只一一比以前開心了, 連我這個憂心媽媽現在也笑多了輕鬆了. 現在每個weekend, 假期我地都會帶他出街影相(以前疲累得連出街的精神都沒有), 因此現在更珍惜跟一一相處的時間.

還有很想在此感謝奶奶 (我每日都面對面讚她的), 未搬近她前會怕遇到別人口中的婆媳糾紛, 因為她給我的感覺很剛強, 愛熱鬧愛說話而我卻剛剛相反. 當時真的很怕當時還是很麻煩很醒訓的一一會令奶奶受不了. 但很感恩的是奶奶只用了1,2日便跟一一熟絡而且很快便摸熟一一性格/喜好. 更感恩是奶奶對我很好, 每日也主動話我知跟一一發生了什麼, 吃了什麼, 便便怎樣, 睡了多久, 讓我縱然不在一一身邊也略知道他的狀況.

至於一一嘛, 這個月明顯比之前開心了, 也交際花了, 對着陌生人也時常笑(不知是否奶奶平日帶他見世面多了有關)

而且這個小朋友自從食糊仔後愛上咬東西, 他的飛佛當然是隨手可得的手指啦, 第2最愛就是人家的膊頭, 第3就是人家吃的東西, 正一為食貓.

這個小朋友愛食也愛動, 平時已經手腳fing不停(連發燒生病也是這樣=="), 最近更扮大個仔愛上企, 每次扶着他雙手雙腿便會發力企起, 只要在旁輕扶住他他可以hold到10秒多. 但反身這方面仍然未懂. 

不過偶然也會有扮正經時候

看著他每日成長就是我每日的動力

4個月

成日話難搞, 手忙腳亂錦又"呼"一聲踏入第4個月, 再懶o既性格都要的起心肝紀錄下一一o既成長先

食

從2.5月開始由4oz>5oz, 再由3月頭開始1日會有2餐食到6oz(多數係晨早5點幾同黃昏o個2餐),
大部份時間都keep到食5oz, 不過當然有時心情吾好, 太眼訓就會食2,3oz收工,
呢方面想迫都迫吾黎. 希望佢一直keep住向上發展啦

(** 其實有樣自己覺得幾羞家o既事, 一一宜家識睇人餵而改變胃口!!
好似上星期錦, 晚晚我餵佢只係食3,4oz, 但我媽/姐姐平日餵就差不多次次清曬;
我諗可能係我見得佢少, 自然同佢親子時間吾及佢地, 一一見親我就食奶所以吾係幾肯同我合作掛.
吾得今個星期幾攰都要多d同佢玩多d抱抱佢)

瞓

一一係一個訓好少o既bb, 我成日都同佢講 "媽媽似bb多過你, 不如同媽媽調轉一一你去返工, 我o係屋企訓多d覺啦",
平均每日只係訓10hr倒, 不過見佢都精神就吾理佢啦. 

夜奶方面其實我都吾知戒左未, 有時4點零, 有時5點幾就起身要食奶, 即係話佢臨訓前支奶最多只頂到5-6個鐘.
吾知幾時只可以真正一覺到6,7點呢
重有一樣就係佢要暗訓覺, 真係吾知幾時自己先狠心同佢戒左去
  
玩/喜好

一一係口水佬(多野講) 爛玩豬(周圍move不停)
- 近期識得照鏡, 次次抱佢o係鏡前同佢傾計都有問有答(佢真係等我講完佢至講嫁), 好似好識講野錦
- 雖然距離識行重有一大段日子但我抱住佢加拿大仔佢對腳真係有意識地向前踏, 重要左腳踏前完右腳踏, 真係估佢吾到
- 鐘意坐吾鐘意訓, 吾知點解2個多月開始一打橫抱/ 平放佢就吾like(可能佢覺得平放係要訓覺意思),
要人抱直/ 俾佢坐起, 因為佢條腰未成熟所以都要好小心比佢坐
- 對紅色野特別like, 新年o既揮春, 紙金魚係佢favorite, 新favorite係床頭轉轉吊鈴, 佢會望實吊住轉緊o既公仔然後好開心錦腳撐撐
-  識得認人/ 認地方後, 陌生人同佢講野佢會喊, 不過抱下"愛"下佢就吾會再喊, 百日宴當晚個個抱都冇扭計(抵錫~)
- 識得抬頭, 重可以hold幾耐tim

其實重有好多但一下子又諗吾起, 記得再講啦~ 總括黎講除左訓覺, 一一係一個好抵打o既小bb (做左人阿媽真係吾敢直接話佢好, 因為試過好多次"衰左")



下個月我地就會離開我媽媽度搬近奶奶 (我爸媽對住左一一成4個月真係超吾捨得佢),
一一宜家超認地方去到新環境又吾知要喊幾多晚先適應到了 (希望越少越好啦).

其實我宜家有個十字路口吾知點揀好, 奶奶可以full time full day照顧一一 (連夜晚都ok). 
好: 老公間吾時就要上大陸做野所以奶奶可以full day照顧一一對我地黎講真係幫輕好多好多,
缺點: 每日見面時間相對少左好多, 只可能放工同佢玩1,2個鐘就要分開,
或者要等到星期六日我地放假先可以full day同佢相處下.

而夜晚湊返屋企照顧
好: 我知點都比吾上FTM可以相處咁多時間,
但至少佢會意識到訓覺可以同爸媽一齊, 夜晚訓醒有咩吾舒服爸媽都o係身邊
缺點: 當然放工之後要捱夜餵夜奶會好攰 

其實好睇我點決定 (亦可以講我肯吾肯付出多d), 老公吾係吾想幫手而係佢返工真係好攰,
我見到佢咁攰都吾想佢咁辛苦啦. 



送上近照一張, 一一開始向橫發展了(不過都係得塊臉), 而我地就越來越殘同瘦, 好大對比 hahaha

我又返黎喇!

消失左3個月 自bb出世後既10個星期都冇一刻得閒過,
佢o既世界就成為我o既世界, 突然變成緊張大師更一度抑鬱, 但得到家人, 老公, 朋友, 奶奶o既開解又醒覺起來.

每日bb都在成長, 每日都有新奇事出現, 我也每日在學習.


11.11.2012 經過9個鐘陣痛, 100%自然(連笑氣都無) 順產11:04pm 出世
為左記念佢出世好多個"一"字, 老公為佢改左個名都有"一"字, 叫"卓一"


頭幾日訓, 訓, 訓, 嚴重日夜顛倒(宜家2個多月都間中午夜吾訓)

1個月後開始多了開眼

不過自第一次出街去奶奶家之後就開始識扭計, 訓得好少, 皮膚又出問題...

越大越"懶"大個, 好似好多bb心事


也由尖臉變方包臉

也笑多了

也多口了 (心情好會狂聊人傾計, 有次午夜吾訓重迫姐姐同佢傾計, 吾傾就喊, 真係俾佢激死)

一一, 看著你每日長大, 我也跟自己說要長大了

Wk 35 - 搬回娘家準備

為左坐月同俾阿B+我最好o既照顧, 我地一家3口o係上上個星期日搬返娘家. 其實未搬前心裡都好多憂慮, 始終結左婚冇耐就有左一來要適應2人生活, 二來有左又易情緒吾穩定, 到左適應左大家生活習慣又要搬新環境, 莫講係老公連我自己搬返娘家都有D吾慣 (好簡單o係阿爸阿媽面前連叫老公都有d尷尬). 希望o係阿B出世前盡快適應啦.

不過自從WK32之後身體真係冇以前咁靈活, 對腳亦有腫, 個肚真係每個星期都大左D (宜家我差不多WK36就有39"了, 不過壞消息係我爆曬紋喇!!). 不過返娘家有姐姐煮飯食完就"印印腳", 媽咪又會煲D去水腫, 清胎毒o既湯, 真係比起之前一收工就趕返屋企煮飯舒服好多. 同埋返娘家有屋企人又有小狗人氣多D我都冇咁悶.

上星期六去覃醫生度檢查, 醫生話阿B頭圍, 肚圍都正常, 雙腳偏長, 磅數2.4KG雖然吾太重不過都叫正常, 姑娘都叫我多休息可以長胎. 希望阿B乖D吾好咁早出世, 錦我就有信心佢可以夠重了(我希望佢出世有~2.9KG).

今日去健康院做B鏈檢查, 聽人講一D都吾痛但點解我覺得"直腸"o個part咁痛o既, 屎啦, 抽少少野去驗我都覺得痛我點生阿B呀~~

Wk 30: 照4D回顧(wk29)

上個再上個星期六(8/9)去左覃醫生照4D, 今次有老公, 老公家姐同行感覺冇上次等得咁耐(好似等左9個字). 開頭阿B吾乖2隻手掌擋住半個臉豬要醫生按左幾次個肚(我諗係fing開佢雙手) 終於阿B都俾到3/4臉我地睇, yeah個衰B個樣都幾係我同老公混合體, 鼻大大似老公, 個嘴仔, 下巴, 臉型似我. 最可愛係佢個"炸腮臉", 搞到人好想"meet佢". 至於手手腳腳就吾多肉地都係長長地. 睇黎我呢個媽媽真係要加油食多d野喇.

張4D相想到阿B出世先一次過post出黎 (到時就知4D相同真人有幾吻合了), 真係好期待見到呢個衰豬呀


(WK 30)
體重 125lbs
肚圍 36.5"